Kulturpris - retningslinjer for tildeling

Vaksdal kommune innstiftar ein årleg kommunal kulturpris f.o.m. året 1979. Prisen er ein gåvesjekk på kr 10 000 og eit måleri.

Prisen vil kvart år verta delt ut på Daledagane. Prisen kan gjevast til einskilde personar, lag eller institusjonar, som har gjort seg fortente til ei utmerking, anten for spesielle tiltak, eller god og trufast innsats for å fremja kulturlivet i kommunen.

Rådmannen vil kvart år i mars månad oppmoda lag og einskild personar, gjennom media, om å gjera framlegg innan april månad på kandidatar til kulturprisen. Formannskap/plan- og økonomiutvalet gjer endeleg vedtak om kven som skal tildelast prisen.

Formannskap/plan- og økonomiutvalet kan også vedta at det einskilde år ikkje skal delast ut pris eller at det kan delast ut meir enn ein pris når særskilde tilhøve tilseier det.

Formannskap/plan- og økonomiutvalet skal leggja til grunn ei svært vid tolking av ordet kultur i si vurdering ved tildeling av prisen.

Prisen må kunna oppfattast som ei utmerking av god innsats gjennom lengre tid, men også som eit prov på at særlege kulturtiltak vert verdsett, og såleis at det inspirerer til vidare arbeid for fornying av kulturlivet i kommunen vår.